بشروه إني أبرحل
بشروه إني أبرحل من حياته
بشروه و فرحوا فيني ذويه
كفنوا جسمي بماضي ذكرياته
ادفنوني فالمكان اللي يبيه
اطلبوا منه إذا خلص صلاته
فوق لحدي يحمله براحة يديه
ولي وصل قبري و حقق له مناته
يدفن انسانه تحبه تموت فيه
علموه اني وربي من غلاته
اعشق تراب مشت رجله عليه
حلفوه يشد و يقوي ثباته
لا ينزل دمع يجرح له عينيه
باكر بيندم و يصحى من سباته
و يحتضن قبري و يبكي يرتجيه
يعتذر عن جرحه و ظالم سواته
معترف بالذنب لكن بعد ايه
ما يفيد الصوت دام الفوت فاته
من خذاه الموت وش له يحتريه
الزمن غادر و تطحنا رحاته
ما صفا حاله على الدايم جذيه
يستوي و يقوم ويلملم شتاته
يبقى شامخ جلد صبار و نزيه
اطلبوه يسمي وحده من بناته
باسمي و طيفي معا بنته يجيه
طمنوه اني مسامحته لذاته
بشروه ... الله يرضالي عليه
و ادفنوه بجنبي ان حانت وفاته
جنب انسانه و ربي تموت فيه
السبت أغسطس 04, 2007 1:15 pm