(( خمسـة وخمسـين ))
مسكين من لا شاف عيناك مسكين
والمسكنة هم ٍ على قلوب الأحرار
العين تجرح دون خنجر وسكين
والرمش دايم يمتهن خطف الأنظار
والخد ، احلى من ورود البساتين
والقد ، تضرب له تحيات الإبهار
واليد ، كنه مزهرية رياحين
والند ، يخسر مابها اي محتار
والرد ، دايم موضعه بالميادين
والشد ، معها مايجيب الا الاضرار
الجـِدّ ، تسحر كل حزة وكل حين
والصد ، في قاموسها عشـّـق و سار
لو قلتوا فيها عيوب خلق الله تبـيـن
وفيها عذاريبن طويلات وكثار
ماجيت ابطلب رايكم يالمجانين
عافاكم الله ارقدوا داخل شهار
والله ورب البيت انْـكم مساكين
لو شفتوا رمشه ، قلتوا استر يا ستار !
فيها حلا يقهر بنات السلاطين
مو بيدها تقهر طويلات الاعمار
له مبسمن كنه من عصارة التين
وجسمن متكتك كنه الطير لاطار
وشعرن سواده من صخور البراكين
وقلبن صفاوة داخله مثل الامطار
وزنه على الميزان خمسه وخمسين
ووزنه في قلبي واحد وعشرة اصفار
اسألها بعض الوقت ، مخلوقة من طين ؟
لو ماني مؤمن قلت من ورد وازهار
انتي فخر للكون لو كنتي تدرين
وان كان ماتدرين اجل هاك الاخبار
الموجز اني اعشقك واسمعي زين
وباقي تفاصيل الخبر ضمن الاسرار
الجمعة أغسطس 03, 2007 12:21 pm
